近來日本、台灣、印度等亞洲地區疫情嚴重，中國亦開始有零星感染個案，眼見距離東京奧運7月23日開幕日僅剩兩個月，焦頭爛額抗疫嘅日本面對國內一片反對聲音，似乎想堅決去馬，連軟銀嘅孫正義都開Post唱淡，點解日本唔停辦奧運呢？會唔會係因為一個「錢」字咁簡單？

（Shutterstock圖片)

孫正義：變異病毒如擴散，損失大過違約金

　　軟銀創辦人孫正義係推特上面連番發文，對於日本目前新冠大流行嘅情況下，仲要繼續舉辦奧運會表示擔憂，佢係推特中提到：

　　「而家超過80%國民都希望奧運會延遲或取消，想問其實係邊個用權力強行推進呢件事？」

　　佢又用利害關係解釋，雖然取消奧運需要支付巨額違約金，但如果因為遊客去到日本之後，令變異病毒擴散，相信會令到日本人嘅生命、GDP、公眾嘅耐心損失更多。不過上個禮拜國際奧委會副主席約翰曾經表示，就算東京處於緊急狀態，奧運會都絕對可以舉行，真係唔知好嬲定好笑。

研究顯示：69%企業支持延遲及取消東奧

（Shutterstock圖片)

　　據日經研究係本月6至17日進行嘅企業調查顯示，呢次訪問合共230間企業，其中37%受訪企業表示支持取消東京奧運，32%希望可以推遲。睇返數據，日本目前僅僅得4%人口有接種新冠疫苗，所以如果真係有大量外地人口進入日本，就算外來人士打好晒疫苗，都可能總會有漏網之魚。

　　目前大阪死亡病例已經超越東京，有2036宗，而大阪每1.5萬名感染者，只有12%可以入住醫院，其他只有留在家中或旅館等候，醫療情況相當危險。而國際奧委會已經有委員表示，6月底前就要確定奧運會是否決定舉辦，否則就會被取消，唔會再延遲。

不單係錢銀問題，或是關「面子」

（Shutterstock圖片)

　　國際體育律師Miguel Mestre向媒體表示，因為奧運會屬於國際奧委會嘅財產，原則上奧委會先有權力決定停唔停辦；而決定停辦嘅原因，其中一個原因係相信奧運會參加者會受到嚴重威脅或損害，某程度上新冠病毒都屬於威脅之一。不過，奧委會似乎無停辦意願，而日本如果選擇單方面取消，其實損失都會落係保險商身上，因為呢類大型活動都會買足保險。

　　取消奧運唔單單係錢銀問題，可能甚至係「面子」關係，歷史上奧運會停辦只有三次，分別係1916年、1940年及1944年，其中兩次都係因為世界大戰嘅影響；而日本上一次舉辦夏季奧運會係1964年，當時日本奧運被視為戰後恢復及重建嘅象徵意義，而今次亦有經歷長期經濟停滯、福島好嘯之後，再次振作嘅象徵意義。不過用人命對比起經濟復甦，你又會揀邊個？

撰文：李皆穎