辦公室戀情不嬲都話係最危險嘅事，但公司就有一對痴男怨女中層，排除一切萬難，展開左一段「佢地以為冇人知，但就全世界都知」嘅戀情！呢段感情嘅刻骨銘心及惹人羨嫉程度，好比神雕俠侶中過兒及姑姑嘅禁忌之戀！

　　中層痴男化名楊過，靚唔靚仔就見仁見智，為人的確頗輕佻，但就只順服於師傅姑姑一人。而怨女叫得姑姑緊係有返咁上下年紀喇，但都叫清麗脫俗、工作上武功幾高強嘅，身為楊過師傅絕對對徒兒寵愛有加。二人嘅師徒之情係日常工作中異變成今日嘅男女愛慕之情，真係人人都有眼睇，大家都慣哂。最大問題係，男女主角仲以為自己收得好埋，但就玩死其他同事！

　　例如神雕二人組不嬲都好習慣OT到office冇哂人，過佢地自己小小嘅二人世界。但神雕俠侶最近就好似驚死呢個已經全世界都知嘅秘密畀人知道咁，係都要搵啲事畀自己team一個新薯做，迫佢OT，直到其他同事都走哂先放新薯收工。新薯就慘喇，因為新嚟，再加上上司要求，唔夠膽拒絕OT要求，日日陪佢地偷情陪到冇哂私人時間，聽講仲因為咁同女朋友嗌交添！犧牲自己，成全人地，真係好偉大啊！但其實同事O得T相信個個歸心似箭，冇人得閒理佢地係假OT定真偷情，況且個個都知道你地師徒之情，冇人會覺得出奇及有意談論，何必迫自己同事做個無用嘅煙幕，浪費人地時間呢？

　　唔止下屬出事，連同級嘅中層都因為神雕俠侶嘅關係中過招！有次大老細一連傾咗多個合作返嚟，再向一眾中、高層分派工作。任務之中緊有難易、高低之分。武功高強嘅姑姑自薦接收咗難度比較高嘅江湖密令，而因為神雕俠侶嘅關係實在太高調，連其他同級高層都知道二人關係，所以特意將有關嘅工作，都留俾楊過負責，咁神鵰俠侶就可以有藉口晚晚都完美合體闖蕩江湖。偏偏中原武林中最強嘅腦細又睇唔透，覺得其他同事專揀輕鬆嘅任務，留返豬頭骨畀神雕二人組，之後大發雷霆，捉哂「膊頭有花」嘅入房瘋狂SM。試諗吓，係當時環境開口同最強腦細解釋神雕二人組嘅關係，就等於用個荒謬嘅藉口去推卸責任，仲唔畀人柄得大力啲？最終神雕二人組緊係畀腦細高度讚揚做到野又盡責啦，但就難為咗公司上下嘅同事為佢地護航。