今日係立法會新一屆會期嘅第一日，承蒙《經濟通》邀請在此「開壇」，畀天娜有個平台為讀者八盡新一屆立法會嘅是是非非，所以都揀正呢個「黃道吉日」開始呢個新專欄。

　　第一篇文章題目係「執位」。廣東人最鍾意喺打牌時用呢個詞語，打完四圈有人輸有人贏；總有人輸咗賴地硬，想話執返個靚位再博殺過。今屆立法會同樣係大執位格局，建制、非建制都唔少政壇元老退位，新面孔登場自然係執過晒位；更重要嘅係一直擁有立法會議席大多數嘅建制派，向來處於平衡狀態嘅權力分布，亦都暗暗地正進行大執位。

　　上一屆立法會，大主席、建制派班長、以至最多人腳都係來自民建聯，好自然地大家都當咗民建聯係「大佬」，起碼大家表面上係咁，「尊師重道」，暗地裡點樣不滿都係枱底嘅事。但新一屆議會，大主席一職由四屆無爭取過一票支持（四屆自動當選）嘅經民聯主席「硬做梁」（Andrew梁君彥）做硬，政圈更一直盛傳，梁係要靠西環出盡「洪荒之力」去鎮住「反對派」先坐得穩呢張69人之上嘅主席櫈；一班經歷過選舉戰火洗禮嘅建制派自然係唔多順氣，睇下田二少爭主席位時將不滿「硬做梁」嘅肉緊態度擺晒上枱面，已經一清二楚。

　　大主席執位建制派都火頭處處，建制派班長最終更係由無黨無派嘅廖長江擔任。明眼人一睇就知，建制派已經無一個聲望、民意同能力都有返咁上下嘅人可以壓住個場，背後嘅強力部門唯有推舉一個無黨無派嘅做班長，免得大家唔順氣。

　　睇牌面，執位過後民建聯無晒重要位，得李慧琼有個內會主席做；但天娜聽聞，呢個其實係幾大元老嘅精心安排，因為今屆立法會變數係史無前例之大，身居要職鑊氣極重，民建聯仲要靠直選搵食，執位過後等其他建制派頂住亂局；反正，立法會呢場牌係無限圈，呢四圈食得少糊，咪等下四圈囉！

　　下次同大家八下其中一個「大黨」嘅黨內矛盾。