任何一個大選，親民牌都係致勝關鍵，所謂「得民心得天下」，過去幾千年都係同一個方程式。但真係勢估唔到，一向滴水不漏嘅林鄭月娥，喺賽事進入大直路階段竟然犯下一個超低級錯誤－「天水圍論」。

　　「天水圍論」係上周五（17日）爆出。林鄭月娥原本答應多個團體，喺上周六（18日）到天水圍討論墟市政策同埋領展(00823)問題，但係上周五突然取消有關行程，加上已經係第二次甩底，即時被主辦單位聲討。而主辦單位更加爆出林鄭爽約原因，林鄭競選辦親口指「林太太攰、天水圍太遠」而要取消行程。雖然林鄭競選辦其後再為事件解畫，指林鄭近日工作非常頻密，需重新檢視及調整行程，並要準備周日（19日）嘅選舉論壇，所以先至取消。

　　雖然「太攰、天水圍太遠」唔係林鄭把口親自講，但有關方面從來都無直接否認講過呢番咁無「政治智慧」嘅說話，好明顯林鄭同整個團隊都只可以認衰仔。而今次「天水圍論」可以進一步睇到林鄭嘅一啲特質。

　　一，林鄭係一個目標為本嘅領袖。去天水圍見街坊，的確係太遠水腳，而見嘅又唔係選委，親民Show都已經做過幾壇，少一單唔過分。而從之後嘅「選委民調」都睇得出，「天水圍論」對林鄭選情係零影響，因為票不在天水圍街坊身上，就連來自天水圍選區嘅建制議員亦都無出聲反林鄭，證明林鄭睇法非常正確，既然唔影響選情，做少啲又何妨？

　　第二，林鄭係一個睇大局嘅領袖。全港18區，區區都有問題，如果區區嘅問題都要由林鄭處理，咁林鄭枱面堆積嘅文件，真係疊到去佢個鼻到。天水圍嘅問題係要解決，但亦唔係影響到香港大局嘅議題，亦唔係選委特別關心嘅議題，所以林鄭先至兩次甩底唔入天水圍，Tina相信林鄭係一個大局為重嘅領袖，地區問題就由地區解決吧！

　　最後，林鄭係一個有堅定意志嘅領袖。林鄭喺七台主辦選舉論壇講過，「如果香港人的主流意見認為我無辦法擔任行政長官，我係會辭職」，之後佢解釋，主流意見並唔係指民意，因為民意有高有低。天水圍論亦係視民意如浮雲嘅例子，林鄭唔會因為民意而左右到佢對事件嘅睇法，一啲任務只要佢認為係正確，佢就會一往無前咁去執行。

　　有咁嘅特質，林鄭又點會唔得到阿爺喜愛呢？預祝林太大勝而回！