理大暴力抗爭事件已經踏入第五日，自行行出去「自首」嘅、同賢達出去「登記」嘅、從唔知邊條水管逃走嘅，再加埋被警方捉到嘅；計計埋埋已經過千人，但係仍然堅守喺理大入面嘅抗爭者，為數仍然有近100人，當中仲有部分未夠18歲嘅細路喺理大之內，拒絕「投降」。

　　唔記得係星期二（19日）定係星期三（20日）朝早，Tina聽收音機時政節目，有兩位「理大圍城」被困少年嘅爸爸媽媽打上電台講返佢哋細路嘅情況，Tina深刻體會到兩位父母嘅憂慮。兩位父母都唔能夠直接入去理大見到自己仔女，只能夠喺理大外圍心急如焚乾等，或者打電話同仔女傾下。佢哋不約而同都話，依家係無人能夠勸到兩個細路出來，因為細路喺入面話要同朋友一齊同生共死，對政府、對警察嘅信任度係「零」。其中一位媽媽更加喊住咁埋怨政府、警方一路以來嘅手法都無諗過為事件降溫，只有不斷咁刺激示威者嘅情緒，搞到今時今日咁嘅局面。

　　事件發展到今日，依家無論係歸咎暴徒升級暴力或者係警察嘅手法都已經係無用，因為雙方已經無晒互信嘅空間。Tina亦相信香港700萬人入面，只有一位「女士」有能力去做啲嘢去解決呢個困局，但今時今日仲會有香港人對呢位女士有寄望嗎？香港人只能夠靠自己。 

　　Tina唔係乜嘢大人物，我講乜相信大家都可能聽唔入耳，但我真心希望喺理大入面已經換咗成年身份證嘅「大人」，好好咁同入面仍然留低嘅細路傾下，勸佢哋自己走出來先返屋企，因為佢哋有任何損傷，全世界最擔心嘅只有自己嘅父母；而作為「大人」要為自己行為負責以外，亦應該為未成年人負責。

　　至於其他堅決留守嘅「大人」，選擇留低，可能係你哋對政府零信任，亦可能係展示你哋「捨身取義」嘅勇氣。但去到呢一刻，留低只有係等被捕、甚或者係更差情況，比起行出去絕對係無著數。如果你哋嘅理念係所謂「解救香港」，大家又點解唔揀一條無咁差嘅路行呢？