前特首梁振英不斷向現任特首林鄭月娥開火，搞到阿姐早前喺記者會上拋下一句「唔會逐一評論意見領袖（KOL）」火上加油嘅回應。事件發展一周有餘，前立法會大主席曾鈺成亦都加入戰團，批評CY咁勇猛會不利政府治港，而今次梁營重炮手張志剛亦都還擊。

　　曾鈺成上月底接受網媒訪問時就話，CY對林鄭政府嘅批評不留餘地，有干政之嫌，「現屆政府仍然舉步維艱，多一個人或陣營指指點點，肯定會添加施政難度」。佢仲質疑，究竟「中央係唔係好想睇到咁嘅局面呢？」

　　張志剛火力全開式反擊，批評曾鈺成：「過去十多廿年，曾先生對歷屆政府指指點點還算少嗎？」佢亦反駁曾指CY係「干政」嘅說法，舉例美國前總統奧巴馬曾批評特朗普政府退出《巴黎協定》。

　　對於出現前特首瘋狂批評現特首嘅局面，有政壇中人坦言，學曾鈺成話齋，中央理應唔想見到咁嘅局面，「有咩批評，閂埋門大家任你鬧無問題，以往人大政協會議，唔少老政協就一啲政策都不留情面咁批評中央政府，咁樣絕對無問題；但係對外，阿爺係絕唔容許畀人有呢種黨內互鬥嘅情況。」

 （資料圖片）

　　政壇中人指出，由CY開火鬧現屆政府到依家，都未見到CY同梁營收手，仲繼續點起唔同火頭，佢相信得兩個理由，一就係阿爺已經叫過CY少句聲，但係CY仍然我行我素；二就係阿爺默許CY咁做，營造一個要換特首嘅氛圍同輿論。而佢自己就推斷，似乎係後者比較似。

　　「從疫情一直以來嘅發展，林鄭受盡建制派一支支暗箭，聽聞西環自己都向北大人打咗唔少現屆政府抗疫不力嘅報告，而普遍輿論都對林鄭政府失去信心；正常情況喺維穩大前提下，阿爺點都係要扶一扶特區政府，無理由任得CY去到咁盡，所以近日對梁營開火並無作出制止嘅最大可能，就係呢步都係阿爺要行嘅棋，係為明年特首選舉進行部署。」至於咁樣係唔係代表林鄭機會接近零，政壇中人只回應一句：「接近零都叫有機會，只怕係…..」