的確是個極端的人板，也吸引了極端的反應。

　　做老闆的對他深表同情，簡直是感同身受。

　　做夥計的對他深惡痛絕，簡直恨之入骨。

　　主角是一位飲食界的拼命三郎，白手興家。人頗有點霸氣，竟然改名拿破崙！

　　大伙人一起吃飯，有人問:

　　「二萬蚊洗碗都冇人做，係真唔係？」

　　「係真嘅！火鍋店唔止添。」拿破崙答。

　　眾人議論紛紛:

　　「有D銀行分行經理都冇二萬幾蚊人工呀。」

　　「洗碗好辛苦架，又重、又濕、又熱。」

　　「我知，我日日都洗!」拿破崙權威地說。

　　跟著他說了一個洗碗的故事。

　　且用他第一身來演繹：

　　我有個（口靚）仔做洗碗嘅，遲到早退，hea到無比，我都忍佢咧。

　　有一日，我睇住佢洗碗，好耐都洗唔到幾隻。

　　佢發現我昅住佢，就呻咧:

　　「唉！真係好多碗洗！」

　　「你係咪信教架？」我問。

　　「吓？」佢唔知乜頭乜路。

　　「你係咪信摩西架？洗碗又摩、講嘢又西遊！」

　　跟住我捲起衫袖，叫佢揸住個stop watch。

　　「我洗俾你睇，俾三盤碗我！」

　　洗完三盤，清潔埋傢撐，4分半鐘！

　　佢10分鐘都洗唔到一盤。

　　「嗱！你要玩嘢，唔好同我玩。你太小兒科，你有D壇數再嚟攪嘢。」我轟佢。

　　拿破崙好勞氣地講完這勞資鬥法事件，舉腳贊成輸入外勞。

　　「喂！咁佢俾你照完肺有乜反應？」

　　「佢恍然大悟咁話：『我真係要努力啦! 』我以為自己聽錯，佢補一句: 『努力去買六合彩! 』」

　　「梗係啦！要努力脫離你魔掌嘛。咁你有冇炒佢呀？」我問。

　　「冇！我繼續丙，佢繼續hea。人生就係咁！」

　　這個「寸」老闆啲相：鼻高、鼻短、鼻尖。依次即果斷、心急、零容忍(不過結果都要忍，唔係就自己日日表演洗碗！)

　　這個「寸」夥計的相，一詞以蔽之：三尖八角！即長大的環境差、做事的態度差，好攪小動作。教極都唔聽。

　　真係天造地設嘅一對「寸」老細與「寸」夥計！