要看一個人度唔度到好蹺，最簡單的方法是看耳珠。

　　耳珠厚的人，天生好蹺（眼神遲鈍者例外）。

　　試看看世界首富，耳珠靚到好似粒小丸子嘅大把，又厚又立體，與其身家睇齊。但其實社會的草根階層，也有些靚耳珠「蹺王」。

　　以下描述的都市小人物，展示的雖非新蹺，妙在it works，還是在緊急關頭呢！

　　一日正與這位肥頭耷耳的士司機瞎扯，突然一陣刺耳的警車聲，嚇然見到一位虎背熊腰的交通警出現在窗前，他問司機：

　　「你知唔知你犯咗錯？」

　　「對唔住，亞sir！」司機賠笑說。

　　「你知唔知你錯咗乜？」

　　「對唔住，亞sir！」

　　交警再重複問題、司機又重複以上答案。如此玩咗七次。

　　我在旁看得心驚膽顫，怎麼會有人這樣反應的？商界中人，最忌對方像壞唱片，最好係迅速回應，就算與事實唔夾、甚至無厘搭霎，總之要有問必答！

　　交警愈問愈大聲，我以為他會抽司機出嚟狂丙。點知佢突然頭也不回，一溜煙地跑了！

　　「司機，你好蹺喎！」我讚歎說。

　　「唏，啲白搾好興喺天橋「目及」住，一見人切錯線就追過嚟。」

　　「頭先真係險、好在唔要面。」我想。

　　我從小鏡看到他雖然額頭五官都唔掂，就係有耳珠，嘿！一招攪掂。我想這位交通警可能怕自己心臟病突發猝死，所以不再問這「白癡」司機了。

　　數日後，我抄蹺。

　　春天，和風麗日，我一身淡藍，連絲巾、手飾、黑超都襯埋，自覺很輕快。街上恰巧碰到業主立案法團的委員，他提出了一個棘手問題。告別後，我正在思索，忽然被一把男聲喝住：

　　「小姐，你知唔知紅燈唔應該過馬路！」

　　原來是兩位英偉健碩的警察！

　　「噢！唔好意思呀！」我迅速回魂答。

　　「你講唔好意思冇用喎！你睇住我地兩個都仲過馬路，係咪唔俾面先！」

　　「對唔住，亞sir！係我錯！」我一面不斷重複道歉，一面滿臉懊悔，梗係懊悔啦！點解有兩個咁靚仔嘅警察都睇唔到吖？平日見啲警察，又四眼，又挺住個肚腩，呢兩個簡直係男神級喎！

　　俾男神罰都抵嘅，正在準備引頸就戮，點知其中一個說：「你走啦！」

　　嘿！認衰認錯真係世界絕蹺！唔知佢係咪鍾意淺藍色呢？