「I found heaven！」她歡呼。

　　但在她還未找到天堂之前，卻在地獄徘徊了一會。

　　所謂一會，其實整整三年，結了婚十多年，近年不停有小三、小四……小七打電話來：

　　「佢已經唔愛你，點解仲要縛住佢？」小三振振有辭。

　　「喂！我冇縛住佢，縛得住佢就唔會周街走，同你攬埋一堆啦！」她無奈地答。

　　「你要自量得㗎，人又老、錢又冇、一肚草，你老公話完全唔可以同你溝通，你完全唔明白佢。」小四肆意進行人身攻擊。

　　「我梗係唔明白佢啦，我唔明佢嘅品味點解愈來愈差！」她企圖還擊。

　　「你點解要霸住佢，阻住地球轉？」小七，一輪數落她，然後奉上魚蝦蟹海鮮大會。

　　「我都唔想霸住佢，你啱使就攞去啦！」

　　老公有情婦都算了，件件都咁潑！她終於投降了。

　　離了婚，碎了心。

　　她回到教會，希望在花香燭光聖像中找到心靈的倚靠。

　　誰會料到，她真的找到個可倚靠的寬闊肩膊。

　　這肩膊屬於一位天堂來客，是虔誠教徒，姓Heaven！

　　初遇時，她好奇地問：

　　「你個姓咁好嘅！係咪自己改㗎？」

　　「我老豆個老豆個老豆已經姓天堂喎。」

　　一個月後，他求婚：

　　「親愛的，請相信我，This is a match made in heaven（我們是天堂的天生一對）。」

　　「我唔想咁快上天堂喎！」她俏皮地說。

　　「Hey !There is heaven on Earth !（天堂在人間），你要讀清楚聖經。」

　　婚後恩愛得不似在人間。

　　緣這回事，本來就很玄，與天堂之緣，就更玄了。

　　但原來世界上還有姓Hell（地獄）的，各位姊妹要小心喔。