熱鬧、卻又荒蠻。

　　這邊廂全是綠色生命——吊在天花板下、爬在兩邊牆上；那邊廂全是人，吃著綠色生命。

　　在這充滿落差的時空，我注意到身旁兩個大鼻子男人，在我一左一右。

　　右面的四眼老豆，牛記笠記，有那種IT專業自閉Feel，帶著妻女，沒問過她們，徑自點了菜。

　　紅菜頭risotto來了，顏色近血，妖艷驚人。甩牙o靚妹唔肯食。跟住上素火腿寬條意大利麵，她於是大口大口地送進咀裏。

　　「哎吔！好辣呀！」她立刻吐了出來。

　　「唔係好辣啫，食啦。」老豆仲未食，已不由分說命令靚妹。

　　老豆跟住示範唔怕辣，誰知食咗一口，立刻狂灌冰水，然後講：

　　「唔！係幾特別。」

　　就係唔認辣，亦唔認怕辣。

　　我右面係奀瘦西裝友，發育不良，發情卻澎湃！

　　佢嗰塊面，你除咗睇到個大鼻之外，其他五官，好似上帝做唔切咁，有Ｄ　unfished嘅模糊感。不過佢感情嘅表達，非常鮮明。佢唔係搓女仔隻左手，就係錫佢右手，肉緊起上嚟，雙龍出海，攬實雙手。

　　成餐飯，只聽到佢重複。

　　「你知啦！你嘅事我一向都好上心。」

　　「佢地冇理由咁對你嘅，我一定為你出頭。」

　　「我真係唔可以睇住你俾人蝦，呢件事，包在我身上！」

　　佢就算去洗手間，仍頻頻回頭，好似想帶埋女神去咁！

　　不過又係嘅，佢顏值欠奉，就要誠意打動。佢除咗顏值蝕底，相學上都有問題。面削鼻大，完全唔襯、亦唔穩。我想：結咗婚呢，觀音兵就會變咗楚霸王。

　　鼻大嘅人，多數以自己為宇宙中心，認為自己係專家、係英雄。鐘意話事、救人、或點人。強項係認叻、弱項係自省。

　　不過鼻大若配眼神平和、顴鼻相襯，就係荀盤，只係有Ｄ大男人，但一定孭飛。若眼神露、兩頰削，就講多過做，仲勁愛呷醋，係個扮英雄嘅狗熊。

　　兩個大鼻男人，各施絕技，企圖馴服身邊嘅女人。而我，就喺綠野人羣中欣賞有趣風景。雖然我並不大鼻，但我敢講：我嘅男伴係全場最帥嘅風景！