特金會在全球矚目下觸礁，美朝各執一詞，真相撲朔迷離，一位朋友的朋友傳來「真知灼見」，解釋此會未能以風光簽約作結的原因。

　　以下是經本人「草根化」的模擬對白：

　　特：你先棄核，即簽。

　　金：你先解禁，即簽。

　　特：我解咗禁你唔棄核，點算？

　　金：我棄咗核你唔解禁，我點算？

　　特：我個朵咁響，你怕咩？

　　金：你強項係反口，我唔信！

　　特：你個「口靚」仔竟然Challenge我？我嬲！

　　金：嬲咪嬲囉，我嚇大嘅。

　　特：呸！我閃咧，唔傾！

　　金：唔傾咪唔傾囉，睇邊個要民望！

　　特：氣死我咧！

　　據此花生友所創作的「死因研究報告」披露：這「世紀大撻Q」皆因選址問題：

　　「此次會談，選在越南，即「越談越難」，本來兩方人馬談好的協議，結果跌入河內！」

　　無論國際大事或玄學探索，都講究天時、地利、人和。時機是對了、人物也都有安撫國民、往自己臉上貼金的意願，就是地方不對！哈哈，完美邏輯！

　　花生組另一朋友迅速以豐富想象力及打油詩創作力回應：

　　「原來是如此。

　　特普本無恥

　　唔怕行一次

　　雖然燒銀紙

　　本望諾貝爾

　　破局不宜遲

　　反枱話咁易

　　肥金唔怕屎

　　老習話晒事

　　橫批：孺子可教」

　　以上純屬攪笑，希望沒有洩露了國家機密！