上星期到一家快餐店用膳，食物到手，我打開包裝紙，發現原是雙層的漢堡包少了一層漢堡扒。我把包帶回櫃檯，向店員指出情況，店員拿過漢堡包查看了一下，之後說了兩聲「唔好意思」，便把漢堡包掉進他身旁的垃圾桶。他再從身後拿了一個新的雙層漢堡包給我，然後再補多一聲「唔好意思」。當刻我在櫃檯前呆了半秒，因為我一直只是期望他會補回一塊漢堡扒給我。眼巴巴看著一份完好的食物掉進垃圾桶，作為顧客的我其實並不好受，縱使我在今次交易中毫無損失。然而，「惜食」對餐廳來說有價值及有市場嗎？

　　而家有好多食肆都會做一啲「惜食」推廣，例如你落單時叫少飯，佢就會捐三蚊去食物銀行，又例如有一啲餐廳及超市會將已過最佳食用日期，但仍然可以食用嘅食物捐到有需要嘅社福機構。其中一個我最喜歡嘅「惜食」推廣，就係幾年前法國超市Intermarché嘅「Inglorious Fruits and Vegetables」，推廣「肉酸蔬果」。原來大部分超市都會將好多唔合格嘅蔬果丟棄，但其實所謂唔合格，有時只係指形狀唔夠靚、唔夠大或者顏色比較奇特，但佢哋嘅味道、營養價值其實同一般蔬果無異。Intermarché為呢一類「肉酸蔬果」拍攝海報、電視廣告，更喺超市設置獨立專櫃，以優惠價出售，結果反應非常熱烈，顧客非常踴躍購買，超市平均人流上升24%。「肉酸蔬果」推廣活動亦引來傳媒廣泛報導，指呢個活動好應該喺所有法國超市實行，減少浪費。

　　大部分人喺超市揀生果，總希望揀個又大又圓嘅返屋企，但點解Intermarché嘅顧客願意畀錢購買一啲外形奇特嘅蔬果？佢哋畀嘅錢除咗買到蔬果外，其實亦同時買咗今次活動背後嘅理念，以行動支持「惜食」。以往品牌做宣傳，往往只著重突顯產品質素，但今時今日品牌理念係重要一環。即使你嘅產品未必係市場上最好，但只要顧客認同你品牌背後推廣嘅理念，你亦可以吸引到一大班捧場客。今次Intermarché正好做咗完美示範。

　　據調查，人類製造嘅食物平均有三分一最終會被浪費（約13億噸），而全世界同時有好多人得唔到足夠嘅糧食同營養。我相信大部分顧客嘅內心都有「惜食」嘅心態，關鍵在於有無合適嘅campaign去喚醒消費者呢一顆良心。