早幾年VR剛剛出現，好多公司視此為商機，都計劃推出VR程式。但VR 推出已經有一段時間，較為出色、好多人用嘅VR程式其實唔多，利用VR創業成功嘅公司亦較少。早幾年有好多VR產品／程式都係為做而做，並冇乜實際用途。到今時今日，VR較為常用嘅地方，主要係遊戲公司或主題樂園，模擬遊戲內實際環境，令玩家猶如置身其中。但其實VR嘅用處可以點樣發揮呢？

　　追溯返第一代VR嘅出現，相信都係上圖嘅View-Master。View-Master出現於二次大戰時畀美軍作軍事用途，用嚟識別敵人／武器，大戰結束後先變成商業同娛樂之用。

　　其後VR 第二代Sensorama喺50年代出現，開創先河，能夠同時有多種官能體驗如視覺、聽覺、嗅覺等。但類似呢種多官能體驗，直到 2000年代左右先開始為大眾普及。

　　現今較成功嘅VR程式／遊戲，都係於娛樂／遊戲行業出現，玩家玩VR嘅同時，亦同時玩緊比當時人。以遊戲角度嚟睇，仲有好多進步嘅空間。而近年較為用得其所嘅例子，莫過於將VR融入醫療之上，幫助病人得到更好治療，稱之為「Therapeutic VR」。

　　睇醫生時好多人都好怕打針，由其係小朋友，雖然打針嘅痛楚十分細，但要親眼見自己被針刺傷抽血，呢種恐懼係有少少難克服。就針對呢個問題，巴西一間科研公司開發VR動畫程式，醫生只時配合程式安排嘅時序打針，就能夠大大減低小朋友嘅恐懼感。

　　小朋友帶上VR眼罩後，先能夠避免小朋友直接見到自己被刺傷，同時間VR內嘅動畫帶佢哋進入第二個世界。動畫以卡通英雄歷險為主題，講述英雄需要喺手臂加上冷熱徽章先能夠打敗壞人。當動畫內嘅精靈幫小朋友貼上冷徽章時，醫生同時間搽上消毒藥水，貼熱徽章時就幫其打針。故事完結後，醫生亦喺小朋友手臂上貼上同動畫一樣徽章膠布，令佢哋完完全全地投入角色。

　　喺Therapeutic VR嘅協助下，大部分小朋友已經冇喺打針時反抗同落淚，同時間亦勇敢面對，令佢哋覺得打針係英雄嘅表現。

　　現今好多公司會首先諗「要用呢個工具」，之後再諗「點樣用呢個工具」。但其實我哋應該係「因為有呢個問題，所以用呢個工具」。其實一個好嘅solution有時並唔需要太多花巧嘅東西，只要搵到事情嘅pain point，再適當地運用工具，先係最簡單、最直接。