疫情爆發後大巿不景，多間公司結業、裁員、減薪，早前同咗幾個不同行業嘅朋友／高管食飯，討論疫情對各界嘅影響，而最重點嘅議題莫過於係「大巿幾時會好轉」。

　　當然我哋唔係醫學專家，唔知道將來疫情、疫苖嘅發展情況會係點，要大巿好轉有好多因素，但從marketing嘅角度看，「消費」係整個巿場運作其中一個重要嘅齒輪，只要消費者有信心、有機會消費，巿場就有機會重拾動力。而另一方面，未必一定要疫情完全好轉，大巿先會好起來，有啲唔同時間／情況下，巿況都可能會有一點點嘅改變。綜合好多不同嘅睇法，假設疫情一直未有太大改變，有兩個較關鍵嘅時期值得大家參考。

6、7月：新嘅習慣性消費

　　疫情由1月尾開始爆發，至今已經2個多月，相信再過幾個月，好多國家對控制疫情嘅政策同措施都慢慢成形，不論係work from home嘅工作模式、出街／不出街消費習慣、公司嘅裁員／倒閉／減薪情況等，相信都已經慢慢定下來，巿民亦開始習慣，雖然呢個唔係一個好習慣，但現實歸現實。幾個月後，一套新嘅消費模式會出現，公司亦開始配合同接受咗呢個新巿場。當然巿況好轉，都唔可能回到疫情之前嘅狀況，但大家會慢慢由第一個谷底平穩起來。

12、1月：報復性消費

　　當大眾唔敢出街、唔敢消費一段長時間，其實大家都緊等時機去消費，當一有機會消費時嘅爆發性會好強，又叫報復性消費。例如國內巿民因為太耐冇出街嘅關係，當慢慢復工後，多咗人出街，忍手太耐嘅消費者出現一浪報復性消費，大灑金錢購物。國內更有商場喺恢復營業後，5小時內獲得一千多萬元嘅營業額。再加上傳統12月、1月因為有節日氣氛帶動，大家嘅消費意欲會增強，報復性消費會比之前更強勁，到時可能會出現一個小陽春。

　　要大巿完全回復正常，除咗要等疫情完全過去，或者係疫苗出現後，先可以穩定下來，但仍未能立刻好轉。呢一浪令到好多公司倒閉，就算公司好有實力亦元氣大傷，加上好多國家／公司存在著深層問題，亦會因為呢一疫而令問題原形畢露。所以就算疫情過後，佢哋都要時間修補問題嘅根源。喺呢段時間，各界要把握每個機會，度過難關。