筆者見到炒槓桿外匯、黃金（倫敦金）或其它高風險產品的人，不同人有不同的入市原因。有完全不懂風險和只想打發時間的人，例如長者；或想賺快錢的年輕人、主婦等；甚至專業及高學識的人例如大學講師，他們開始時也計算過輸得起，不妨一試。

　　本來有多小錢買入同等價值的外匯、黃金來投資，風險是有但不高，但由於槓桿外匯、黃金是用孖展（等同借貸）的形式來炒的，就完全不同了（見前文）。如果不肯斬倉，或者斬唔切，或者公司幫你斬，而輸超過按金是要補水。炒槓桿輸得最危險是唔肯輸，加上因為溝貨、加倉、補倉，導致再輸多很多！

　　 我見過很多例子，本來諗住輸贏３、５萬元，結果是損失了幾十萬，這是太可惜。亦有些快退休、退休的投資者以為少少試吓，結果泥足深陷。在９０年代年初的時候，我拿到槓桿外匯牌（當時的‘大牌’可以幫人揸盤），所以有一些經驗。

槓桿壓力承受不到

　　炒槓桿外匯好少人會贏到錢，我只是看到一個之前做美股基金經理同一個炒成衣配額的兩個炒家炒到發達。炒槓桿外匯等其實相當之困難，因為槓桿很大，壓力令人的心理承受不到，就算睇啱都係輸嘅收場，因為賺就想賺更多，蝕就不肯離場，死捱難捱。

　　如果炒外匯有任何巧妙之處，可能就是做單邊。何謂做單邊，你覺得那種貨幣趨勢仍然強的，就只做買入，這樣還好一些。例如認為美金趨勢仍然強的，持續買美元而沽其他外幣，譬如倘若澳幣升咗，在上面沽番落嚟，贏面會高啲。

用一成資金

　　炒槓桿外匯最重要守則，其實是資金控制，就是用一成資金，輸了離場。例如有100萬元，最多只攞10萬出嚟，你有50萬的話，就最多攞5萬出嚟。好多人初初就話，我會聽你的建議用一成資金投資，開始試過贏兩次後，便說早知唔聽你講啦，買大啲咪贏大啲啦！

　　最後可能就瞓身，很多人有幾十萬，甚或幾千萬，最終變咗零，偶然一個半個識收手就賺好多離場，這不只在香港，內地、新加坡和台灣也一樣。很多時候，因為睇到報道關於一些樓神、股神賺大錢，於是去搏、去炒一些不熟悉啲產品，其實太過標榜呢啲會害死好多人，這只是短暫幫多幾個人發吓夢，實際上是沒有用的。

　　別人投機賺快錢一定有他的特別原因，我們是很難學到的。唯一容易做、可以做的是自己管理好資金曝露在市場上的風險，就是用一成資金。

　　因為叻嘅人賺到錢不會說出來，蝕咗嘅亦都唔好意思講出來。