近呢幾個月金價上升，多咗人留意金市，亦多咗人買實金投資。但原來「金」都分好多種，又「現貨金」、又「期金」、「9999金」、「999金」......要識晒都好「金」吓；仲有，買賣實金又有好多技巧同細節要注意。今次我哋搵嚟永豐金融資產管理董事總經理嘅Mark To同我哋講吓－－金！

（Daren攝）

現貨金、實金、飾金知多D

（受訪者提供）

　　嚴格嚟講，現貨金喺國際市場指倫敦現貨金，由於現貨性質嘅因素，所以用家提用就需加上費用，而且兩日之內交收！但從時間角度，另一端係遠期嘅COMEX期金，其實兩者互為相關，經過換算計及費用，最終都係同一回事，因為喺市場競爭嘅情況下，一樣係供求平衡嘅價格，任何一邊出現變化，都會影響到另一邊，即現貨會影響期貨，同樣期貨會影響現貨，呢樣嘢同其他商品或金融產品並無唔同。

　　至於現貨金與期金對實體金嘅影響，其實都係互相嘅。一般嚟講，實體金嘅需求較多係從珠寶首飾或工業用途，但一樣有投資需求存在；相反，期金一樣有業界用嚟對沖風險的功能。理論上，任何一種需求嘅變動，都會反映喺金價上，影響其他市場參與者。

美元低水加上低利率，金價仍有上望空間

（Daren攝）

　　阿Mark認為，喺疫情影響下，全球各地央行都繼續維持超寬鬆政策，相信未來幾年超低利率仍是大行其道，持有實物資產嘅機會成本大降，在資金供應持續嘅預期下，市場對投資保值有一定需求，對於貴金屬如黃金、白銀等將會有增無減。

　　另外，佢又提到目前投資需求有「東金西移」嘅趨勢，目前美國COMEX黃金就高水，而內地、印度地區金價都處於低水，而前者來自西方經濟體的投資需求，後者是實物用途為主，相信金價重上2000美元係仍有機會。

嫁女買金飾，投資買金粒！

（受訪者提供）

　　黃金普遍有兩種需求，一種係珠寶首飾等實際用途，另一是投資保值，買賣黃金要睇需求而定，因為兩者價格都唔太一樣，通常飾金都會貴少少，因為手工雕龍雕鳳等，都要賺你手工費啦？以近期價格水平舉例，當飾金價20920蚊／両，金行金粒價19070蚊／兩，兩者一比，差距1850蚊。

　　咁買實金做投資，入場費貴唔貴呢？其實投資者呢樣嘢真係豐儉由人，可以分散時段購買，阿Mark就介紹返自己間公司，每次最少只需買1克，都係講緊幾百蚊，到你儲下儲下買到一定數量，好似儲夠一兩咁啦，就可以換返一件實體產品。
　

　　咦！咪好似當儲錢咁，完全適合我呢類後生仔入場？！

　　今日講金講住咁多先，下星期仲有黃金白銀精彩料，記住捧場呀！

撰文：李皆穎