2021年先開始兩個月多啲，比特幣價格Chok上Chok落咁，最新幣價已經上過去47000美元，就係因為特斯拉創辦人馬斯克（Elon Musk）大手掃貨，仲話將很快接受用比特幣進行汽車買賣支付，唔通第日比特幣真係可以用嚟買餸？不過有兩個關鍵點可能要留意！

(istock圖片)

＊馬斯克身體力行撐到盡，掃15億美元比特幣＊

(Shutterstock圖片)

　　作為科技龍頭話事人嘅馬斯克，長期都係比特幣支持者，之前已經試過係推特上面出Post發功唱好比特幣，今次特斯拉係噚日（8日）收市後公布，已經購入等值15億美元嘅比特幣，而且同時宣布特斯拉將會接受比特幣為支付方式之一，成為全球第一間可以接受比特幣交易嘅汽車生產商。

　　消息一出之後，比特幣價格又再升過，由噚日39000美元直線飆升，據Coindesk資料顯示，今早比特幣最高見過47031﹒56美元，升逾兩成兼創下歷史新高。幣價日日咁升，唔通個個聽到馬斯克搶貨，都一齊落鑊炒咁有信心？

＊比特幣成主流貨幣，關鍵在於兩點＊

(istock圖片)

　　由於馬斯克帶頭使用比特幣作買賣，唔少人開始會疑問，究竟比特幣係咪會開始普及，第日阿媽去街市買餸都可以用嚟代替散紙呢？首先，比特幣可分割性十分之高，可以計到小數點之後5個位都無問題，而且貨幣儲存量有限，通貨膨脹風險相對地降低，加上唔需要結算商做中間人，結算成本大大降低，原本都係一個理想交易工具！　　　

　　不過，自從比特幣開始進入投機市場，幣價波動成為家常便飯，如果企業用比特幣進行交易，就會存在好大嘅匯率虧損風險，公司明明賺錢，到最後可能因為匯率問題而蝕錢！對消費者而言，今日買架車標價1個幣，聽日就話要1.5個，就算標價可以即時追蹤匯率，都會令消費者無所適從，所以要作為交易貨幣，貨幣價值「穩定」先係關鍵重點！

　　另外，由於比特幣有「去中心化」嘅特點，即係最終目標係想創造一個政府/銀行無法控制嘅金融交易市場。但問題在於，到目前為止未有一個國家承認比特幣嘅法定地位，政府出糧畀員工，或者交稅畀政府，都會使用傳統法定貨幣，持有比特幣就必然存在兌換虧損，乃至一鋪清袋的風險，試問蝕本嘢邊個會做呢？

＊作商品交易仍可看高一線，政府態度為重要風險＊

(istock圖片)

　　當然啦，馬斯克咁力撐，可能都係推高幣價嘅「小手段」。過去幾十年商品交易來來去去唔係石油就係黃金，作為新型商品，比特幣成為各個基金嘅寵兒，有唔少機構投資者睇好比特幣未來五年可以升到40至50萬美元，今年年底就可以破10萬美元大關，因為比特幣產量每4年就會減半，係供應大幅減少情況，幣值只會有升無減。

　　不過！大家都要擔心，如果有一日比特幣會威脅到法定貨幣地位，各地政府都有機會聯手做嘢！就好似中國已經禁止境內所有比特幣交易，只允許區塊鏈技術繼續留低；印度擬禁止比特幣交易，因為該國要發展數字貨幣。所以未來都係數字貨幣大戰虛擬貨幣，炒比特幣就要睇多啲國際新聞啦！

撰文:李皆穎