《小傳日記》麻雀熱潮傳到美國Gen Z，美式麻雀打出全新商業鏈！

　　《小傳日記》近排香港又準備打風落雨，落雨濕濕唔想落街但又想搵埋三五知己一齊聚下、chill下嘅話，咁就梗係約埋一齊打牌啦。一班朋友咁難得聚埋一齊，贏唔贏錢都係其次，大家無非都係想搵樣嘢玩下，聯絡下感情啫。但唔講你唔知，除咗香港、內地、日本呢啲亞洲地方之外，原來連美國Gen Z都開始興打麻雀。之前《瘋狂亞洲富豪》入面打麻雀嘅場景已經引起一定關注，如果熱度持續上升，話唔定經典港產賀歲片《嚦咕嚦咕新年財》有得翻拍做荷里活電影！

　　睇過《嚦》嘅人都大概對美國牌有啲印象。喺美式麻雀入面，莊閒嘅計分方法一樣，冇冧莊，攞完牌之後大家會攞三隻牌同其他人交換，而除咗我地平時有嘅東南西北中發白，萬子、筒子、索子之外，美國牌仲會多8隻「百搭牌」，可以代替任何牌，攞齊8隻隨時食得胡。不過原來美國牌嘅食胡牌型每年都會轉，美國麻雀聯盟(National Mah Jongg League)每年都會發表正式規則書，食糊嘅組合可以有好多變化。

　　正正因為規則每年更新，加上牌型變化多端，唔少新手甚至老手都需要「補課」學新牌型。筆者就發現Youtube上面有唔少教學片，而且好多都係呢一兩年出嘅，每條閒閒哋都有成幾十萬人睇。咁都未算誇張，賭城拉斯維加斯更加出現咗唔少麻雀面授課程，一堂收你60美金（大概470蚊港紙），教你新手上路要點部署；再進階啲會教埋你唔同嘅博弈技巧，甚至點樣為比賽做準備，要再Pro啲嘅仲有一對一嘅私人課程添。筆者不禁心諗，如果真係有足夠多人對砌四方城感興趣，喺唐人街嘅六嬸、三太公，只要經過適當訓練，隨時可以變身麻雀教練！

　　咁打牌係咪真係有商機？美國當地一直有大大小小嘅麻雀社交活動，例如麻雀club同麻雀之夜等，而家更有酒店推出「麻雀Camp」，參加者可以喺營入面有各式各樣嘅麻雀活動、比賽，有各類餐點、嘢飲同社交活動，盡情投入麻雀嘅懷抱。筆者再仔細睇下個價錢，單人參加三日兩夜嘅Camp已經要2513美金，換算返港幣差唔多要兩萬銀！最誇張嘅係，就算咁貴都已經全部爆滿，想參加仲要加入候補名單。

　　睇返Google Trends嘅熱度趨勢變化，「Mahjong」（麻雀）呢個詞喺美國嘅熱度，相比起五年前已經增加咗50%。網上都開始有文獻拆解打麻雀嘅好處，例如可以增加短期記憶力、緩解憂鬱。有外國金融從業者喺網上分享打牌與理財嘅共通點－－兩者同樣需要「擁抱不確定性」，因為無論係牌局定市場都瞬息萬變，我哋未必每次都能砌到最初預想嘅牌型，呢個時候就需要靈活變通、隨機應變，咁樣包裝成件事即刻高級咗。

　　講咗咁多，其實大家有冇諗過，明明大家都係玩緊同一個遊戲，但係點解麻雀喺兩地嘅發展可以咁唔同？喺我哋呢邊，麻雀最多就係節假日大家得閒同三五知己一齊玩嘅娛樂項目，通常都係自己同自己一堆人玩；但喺美國，麻雀唔單止有官方規則書，仲衍生出大大小小面向公眾嘅俱樂部同社交活動。打牌已經由原本朋友間嘅「圍爐共聚」，演變成一種主流社交方式，甚至發展出一條成熟嘅商業產業鏈。

　　筆者就覺得，可能係因為兩地嘅文化與價值觀唔同，令遊戲嘅發展形式各有千秋。對我哋嚟講，麻雀係親情同家庭聚會嘅紐帶，但同時又帶點都市人嘅利落，玩法講求速度、計牌同牌局博弈。但喺美國，麻雀已經演變成一種類似德州撲克嘅社交工具，場景更多係朋友聚會甚至生意往來，再整色整水，加啲美食加啲音樂，同時食中亞裔concept，就可以將打牌變成一場充滿文化多樣性同交流樂趣嘅社交盛事，咁自自然就有商業發展空間啦。

　　無論係推廣又好抽水又好，追逐商機一旦捉錯用神隨時被「炎上」！大概五六年前有幾個美國女生推出咗一套摩登新式麻雀產品，睇落夠晒fancy，但將傳統中文字與圖案改為西方幾何與英文，就被外界批評文化剽竊同欠缺尊重，冇過兩個月就道歉兼刪除社群，只可以話捉到鹿唔識脫角，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。