《魚缸博客》海力士變晒「蟹力士」，炒兩倍個班而家還好嗎？

　　《魚缸博客》博客都話，港股真係無人炒好耐，隻南方兩倍海力士(07709)日日都係成交榜三甲，咩騰訊阿里真係無人理，睇住個股票報價機，7709閃果個頻率同炒美股一樣，你就知道幾咁刺激，不過個個都變晒「蟹力士」咁解。

　　其實呢次海力士變晒「蟹力士」，純粹因為市場賭性太大。應該咁講，禍害源頭係個堆「槓桿ETF」同埋相關期權。ETF要維持槓桿，券商係升市個陣，就要維持固定的槓桿倍數，基金經理必須買入更多衍生品，增加總曝險；相反下跌個陣，基金經理則必須賣出部分衍生品，有種「高買低賣」感覺。

　　而家呢種跌市狀態，基金經理被迫斬晒堆「Option」，同一時間唔需要咁多正股維持，就會順手沽晒正股(Delta Hedge)，每日都重置一次。咁樣就變左「死亡螺旋」啦：ETF跌，「Option」強制平倉，正股強制平倉，下一日又再跌得更犀利，除非市場購買力大到可以推返上去股價。

　　係呢個過程，做市商根本唔會輸，因為「Option」會抵消正股的下跌，仲會食埋你價，賺到盡，總之有交投，做市商就會贏。所以你可以幻想到，韓國市場、香港市場、美國市場，都有幾十隻兩倍三倍ETF係到操作緊，一跌就大家都攬炒。

　　呢件事本身就係股票市場每日都發生，海力士只係剛剛好撞正係風口，當大家發現原來記憶體係有咁多廠商做平替，市場一下覺醒，大戶係高位先割，散戶係下面食晒，根本無路可逃，加上市場吹緊「加息風」，科技股一下推倒重來。

　　博客睇左十幾年股市，其實呢種故事每日都上演緊，歷史每日都在重複，但無人中意讀歷史咁解。炒緊兩倍個班，你們而家還好嗎？上面凍嗎？

《編者按》本欄搜羅即市傳聞，惟消息未經證實，《經濟通》亦不保證內容之準確性。