《魚缸博客》原來馬斯克個室友識「空氣造石油」，呢個世界仲會有能源危機？

　　《魚缸博客》話說最近內地有單幾有趣嘅新聞，博客想分享下。特斯拉創辦人馬斯克當年有個室友，叫任宇翔，後來馬斯克拍住呢個室友做特斯拉，同埋係中國建廠，可以咁講，特斯拉中國廠房佢有一半功勞。

　　但大約係2020年左右，即係特斯拉最風光時候，佢竟然從公司離開，搞左幾年之後，創立一間「上海創立碳生萬物科技有限公司」，去年提出一個觀點：二氧化碳是新時代的石油，簡單來講，就係「空氣造石油」。

　　唔講你以為係詐騙呢？博客起初都以為係，但當博客聽完個原理之後，發現可能是真的：首先利用氣中免費嘅二氧化碳(CO2)，將佢電化一個氧原子之後，就變成一氧化碳(CO)，咁仲有一個氧子就會組合成氧氣；第二步就係拎水(H2O)進行電解，變成氫氣（H2)同氧氣。關鍵一步來啦，將剛才一氧化碳同氧氣混合，加入鐵進行高溫高壓，一氧化碳個氧原子就會離開，剩返碳原子(C)，佢地就會結合成碳鏈，再結合埋氫原子，就變成「人造石油」啦！而鏈條會生成有長有短，短就拎去做石油，長就拎去做柴油。

　　多謝大家，上完化學堂，可以去放小息啦。

　　其實呢個種技術係1925年就出現，但點解無人做呢？一個字：貴。貴過開採石油四五倍，咁不如直接開採石油算啦，搞咁多東西幹甚麼？但個世界總有好多「環保人士」，要符合「環保要求」，其中一個就係航空公司，有部分國家要求航空公司要摻入一定比例的「可持續燃油」，所以人做石油係有佢存在空間；而技術永遠會隨時間而成本下降，只要做得起第一步，往後價格只會越做越平。

　　所以呢間「碳生萬物」係博客近期留意對象，如果真係憑「碳」去生「萬物」，呢個世界仲會有能源危機？中東佬就慘囉，萬一人造有一日平過開採，真係可以擺係屋企慢慢儲起佢算啦。(ul)

《編者按》本欄搜羅即市傳聞，惟消息未經證實，《經濟通》亦不保證內容之準確性。