《魚缸博客》127%關稅都擋唔住？Waymo用真金白銀投咗中國車一票

　　《魚缸博客》中國電動車真係不得之了，搞到美國都要出手，最近美國對中國電動車嘅關稅又再調整，係2.5%基礎關稅，疊100%嘅301條款附加稅，再疊25%戰略物資關稅，埋單127.5%。呢個數，擺明就係想同你講：唔好再嚟喇。結果呢？谷歌旗下自動駕駛公司Waymo，自2024年以來透過洛杉磯港進口咗超過3200輛中國極氪電動車，淨係今年頭七個半月就到咗2600輛，月均300輛。行業之前估佢最多入1000輛，現實係三倍幾。

　　點解越加關稅，美國越要入口？計條數你就明。極氪CM1-E（國內叫極氪MIX，Waymo叫佢Ojai），申報價約3.8萬美元。加完127.5%關稅，落地成本8.65萬美元。運到美國再裝Waymo自家第六代自動駕駛系統，套件成本約2萬美元。全部加埋，每架車約11萬美元。相比之下，Waymo以前用嘅捷豹I-PACE，完成自動駕駛改裝後，每架成本超過20萬美元。極氪方案直接將車隊成本腰斬。仲要留意，捷豹I-PACE已經停產。

　　所以，即使俾多成倍關稅，Waymo仍然覺得抵到爛。

　　呢批車最特別嘅地方，在於一套「中國造軀體，美國裝大腦」嘅分工模式。極氪負責做乜？整車底盤、車身、電池、電驅。呢架車由吉利瑞典設計中心開發，基於浩瀚-M平台，設計之初就係為咗無人駕駛出行而設：純平地台、雙側滑門、低踏板，上落車方便過傳統的士多多聲。車運到美國亞利桑那州梅薩工廠之後，由供應商麥格納幫手，裝上Waymo自研嘅第六代Driver系統，包括13個鏡頭、4個激光雷達、6個雷達。呢套系統比起上一代，傳感器數量減少咗42%，成本低過2萬美元。換句話講，中國負責做最靚、最平嘅「車殼」同「三電」，美國負責裝最強嘅「自動駕駛大腦」。各司其職，各取所需。

　　2026年，中美兩邊嘅自動駕駛法規都有大變動。

　　美國方面，NHTSA提議取消無人駕駛汽車必須配備剎車踏板同方向盤嘅強制規定。新規將自動駕駛車輛嘅部署上限大幅提升至90000輛，但另一邊廂，美國《聯網車輛最終規則》對中國軟硬件嘅限制，軟件禁令2027年生效，硬件限制2030年生效，理論上會封殺中國製智能車進入美國。

　　Waymo點拆招？佢哋入口嘅係唔帶自動駕駛同聯網功能嘅「純電動車底盤」。因為Waymo同極氪嘅合作早在2021年12月就官宣，而《聯網車輛最終規則》豁免2030年前簽訂嘅合約。呢批車，合法上路。中國方面，工信部2025年底首次附條件批准兩款L3級自動駕駛車型准入，並喺北京、重慶指定區域開展上路試點。截至2026年7月，全國累計發放測試示範牌照超2萬張，開放測試道路超5.7萬公里。中國嘅自動駕駛，正從「測試」走向「商業化」。

　　Waymo呢單嘢，最諷刺嘅地方係，美國政府築起127.5%嘅關稅高牆，想保護本土車廠。結果呢？福特CEO自己都話，關稅無法長久隔絕中國車企，本土車廠必須對標中國嘅成本結構進行改革。對於中國新能源汽車而言，即使短期內無法以整車形式直接進入美國消費者市場，但作為全球自動駕駛產業鏈中不可或缺嘅「底層平台供應商」，佢嘅實力已經通過Waymo呢種B端巨頭嘅真金白銀得到咗驗證。

　　127.5%關稅都擋唔住嘅，唔係中國車，而係市場規律。

《編者按》本欄搜羅即市傳聞，惟消息未經證實，《經濟通》亦不保證內容之準確性。