《小傳日記》人升你又升？卡姆丹克迴光返照小散戶唔好太留戀！

　　《小傳日記》今時今日嘅港股愈來愈難捉摸，唔再好似以前咁，睇基本面、國際政經形勢、
公司業績呀，就大致上可以應付，今時今日有啲乜重要過政策市？今年４至５月，中國證監會公
布５項資本市場對港合作措施，恒指由４月１９日收市１６２２４點，升至５月２０日收市
１９６３６點，大約一個月時間，累升約３４００點。至於最近呢一波相信大家都仲記得，由９
月２４日人行降準及下調存量房貸利率開始，並陸續推出一系列促消費穩市場振經濟措施，恒指
由９月２３日收市１８２４７點，升至１０月７日２３０９９點，累升約４８００點。可想而知
，港股對政策市可謂久旱逢甘霖！
　　不過，呢幾年仲多咗一個影響股市嘅重大因素，講緊係花旗國政策，例如藥明系之前被美國
政府指危害國家安全之類，股價跌到殘，有排都返唔到家鄉。
　　除咗個別企業，美國有時又會針對整個行業，好似今日呢單嘢咁。根據美國聯邦官方網站消
息，美國商務部考慮部分撤消中國晶體硅光伏電池嘅反傾銷稅和反補貼稅，並邀請相關各方發表
意見，所涉產品為某些小型、低瓦數、離網晶硅光伏電池。相關板塊午後落炒鑊一轉。其中信義
光能（００９６８）最多急升兩成，協鑫科技（０３８００）仲勁，最高升幅有三成。不過點都
唔及卡姆丹克（００７１２）勁，最高有成４２％升幅。
　　卡姆丹克都算係股市奇葩，呢隻股喺２００９年上市，上市價２﹒１０銀。２０１１年嘅一
波太陽能熱潮，股價曾升上「癲瘋」，高見１９﹒２０銀。同今日最低價９仙相比，高位蒸發
９９﹒５３％。即係高位時投資１００萬銀喺卡姆丹克，今日低位時剩返４３００銀，完全係另
一個足以嚇怕小散戶嘅股仔。
　　股價之所以差成咁，主要係業績做唔起，遠嘅唔講，就講近年業績。２０２０年做５５００
萬人仔生意，結果蝕咗６５００萬人仔。２０２３年生意額大幅上升兩倍幾，仲賺４４００萬人
仔，點知核數師唔提供意見，呢樣嘢大家心知肚明啦！今年７月，公司被申請清盤呈請。其後公
司喺９月公布話已經引入戰略投資者，而戰略投資者已就之前協議嘅債務收購支付大部分款項，
並已進入最後階段，所以公司暫時無恙。
　　不過，睇返公司股權變動記錄。就喺７月尾，即係申請清盤呈請仲進行緊，公司其中一個股
東就喺場外沽出３６０７萬股，每股作價０﹒１０５銀。今個月７號，大股東喺場內沽出２００
萬股，每股作價０﹒１４５銀。連股東都唔睇好，邊個敢睇好？公司股價今日低位反彈４４％，
唔知有無股東趁機沽貨？不過，有樣嘢筆者不得不服，就係呢隻股並無好似啲妖股咁，成日大玩
合股供股之類遊?。至於公司無錢賺，相信呢樣嘢無人想嘅。今日卡姆丹克股價迴光返照，唔知
可以維持幾耐，所以，有貨喺手嘅小散戶就唯有自已執生啦，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。