《經濟不停學》B仔來了你識湊？生物科技股大解構！

 　　個個都講B仔股，唔通個個都知B仔股係咩？事實上呢隻「B」係指（Bioteach），即係生物技術咁解，股份尾有隻「B」字，意思係未有盈利嘅生物科技公司。不過點解佢哋無盈利又可以上市，又究竟點先炒得起呢？去文！

（Shutterstock圖片)

B仔股明明無盈利，點解又可以上市？

　　喺主板上市，要有3年合計溢利達5000萬元，其中最近一年達2000萬元。咁點解B仔股無盈利又可以上市？呢件事要話當年，事關港交所（00388）2018年4月底，簡化咗一啲上市條文，一炮過容許未能通過主板財務資格測試嘅生物科技、同股不同權，以及第二上市嘅公司嚟香港上市。搞咁多嘢，當年就有指係為阿里巴巴（09988）上市鋪路，兼想吸引大型生物科技公司嚟香港掛牌。

(iStock圖片)

　　生物科技公司嘅產品好多時仲喺研發階段；事實上有啲B仔股，上市時唔單止無盈利，仲蝕緊錢添！而研發藥物需要投入好大嘅成本，無付出就無收穫，呢點亦係佢哋要上市集資嘅原因之一。

　　除此之外，為咗保障投資者，聯交所簡化除牌程序，仲限制呢啲公司大改主營業務，防止有人「啤殼」轉賣。

此「B」不同彼「B」，太古AB要分清！

　　太古分AB股大家都應該聽過，不過此「B」不同彼「B」！以前喺香港嘅上市公司，係可以同時發行以港元計價嘅A股同B股，而太古公司大股東史懷雅家族，為咗想用最小成本去控制太古集團，費事被人狙擊，所以就發行太古B股份，而一股太古Ａ嘅價值等於5股太古B，不過AB股投票權就係一樣嘅，所以史懷雅家族就可以將公司嘅控制權攬實啦！

 （Shutterstock圖片)

B仔股可以好波動，新冠肺炎成助攻？

　　之前B仔股價起飛，主要炒兩個因素，第一就係有啲B仔主要研發癌症藥；而家一粒百幾至幾百蚊，研發成功都真係肥過肥仔水；而當公司獲批開展臨床試驗、新藥上市獲受理，都會向外界公布，孖屐當係利好消息，股價咪衝上去囉！

(iStock圖片)

　　第二，有部分藥廠都會研究新冠肺炎藥品，例如康希諾生物（06185）4月9號收市之後公布，計劃喺展開相關新冠病毒疫苗II期臨床試驗，個價第二日就飆咗逾6巴仙。

　　但需要留意B仔股可以好波動，一輪大炒後又可能會大幅回吐。一句到尾，投資涉及風險，買咩股票都要做足功課，買股買前景，萬一前景變「潛景」，最緊要識走位！

撰文：吳藹林

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【你點睇？】港交所推每周股票期權新選擇，若能新增一隻作每周股票期權標的，您會選擇哪一隻？► 立即讚好